Asafu ur ixssin en alphabet Tifinagh
ⴰⵙⴰⴼⵓ ⵓⵔ ⵉⵅⵙⵙⵉⵏ
ⴰⴽⵯ ⵎⴰⵢⴷ ⵉⴼⴼⴻⵖⵏ ⴰⵛⴰⵍ ⴰⴷ ⵉⴳⴻⵣ ⴰⵛⴰⵍ .ⵜⴰⵣⴻⵎⵏⵉ ⴷⴷⴻⵖ ⴽⴽⵉⵖ ⴰⵔ ⴰⵙ ⵜⵜⵉⵙⵉⵍⵖ ⵙ ⵜⵎⵉⵊⴰ ⵏ ⵉⴳⵍⵍⵉⵏ ⵏ ⵓⵏⴰⵥⵓⵔ ⴰⵅⴰⵜⴰⵔ ⵔⵡⵉⵛⴰ ⵎⵓⵃⴰⵎⵎⴻⴷ.ⵉⵍⵍⵉⵖ ⵉⴳⴻⵣ ⴰⵛⴰⵍ ,ⵉⵙⵓⵍ ⵓⵙⴰⴼⵓ ⵏⵏⴻⵙ ⵉⵙⵙⵉⴳⴳ ⵣⴻⴳ ⵉⴳⴻⵏⵏⴰ ⴰⵛⴽⵓ ⵉⴽⴽⴰ ⵉⴳⵍⵍⵉⵏ ⵉⵣⴷⴻⵖ ⵜ ⵙ ⵡⴰⵡⴰⵍ ⴰⴷⴻⵢⵣⴰⵏ,,ⴰⵣⴻⵎⵏⴰⵏ,ⵙ ⵜⵍⴰⵡⵜ ⵏⵏⴻⵙ ⵉⵖⵓⴷⴰⵏ ,ⵙ ⵓⵏⵢⴰ ⵏⵏⴻⵙ ⴰⴼⵓⵖⴰⵍ ⴷ ⵓⵎⴻⴷⵣⴰⵏ ,ⵉⵣⴷⴻⵖ ⵓⵍⴰⵡⵏ ,ⵜⵉⵡⴻⵏⴳⵉⵎⵉⵏ.ⴰⴷⴷⴰⵢ ⵉⵙⵉⵍⵖ ⵉ ⵓⵥⴰⵡⴰⵏ ⵏⵏⴻⵙ,ⴰⵔ ⵙⵙⵉⵍⵡⵖ ⵉⵎⵊⵊⴰⵏ ⵉⵏⵓ,ⴰⵔ ⵙⵙⵉⴷⵉⵔⵖ ⴰⵢ-ⵍⵍⵉ ⴽⴽⵉⵖ ⵙⵢⴰⴼⴰⵖ ⵏ ⵓⴼⵓⵖⵍ.ⵉⴳⵍⵍⵉⵏ ⵉⵣⴷⴻⵖ ⴰⴱⵓⴹ ⵏ ⵓⵔⴰⴽⵯ ⵏ ⵎⴻⴷⴷⴻⵏ.ⴰⵀⴰⵢⵢⵓ ⵏⵏⴻⵙ ⵖⵉⴼ ⴱⵓⵜⴻⴳⵣⵓⵜ ⵉⵏⴻⵃⵢⴰ.ⴰⴷⴷⴰⵢ ⴰⵔ ⵉⵙⵙⴻⵎⵎⴻⵛⵜⴰⵢ ⵜⵉⵙⵏⵏⵉⵜ ⵏⵏⴻⵙ ⴰⵔ ⵜⵜⴻⵎⵎⴻⵛⵜⴰⵢⵏ ⵉⵣⴻⵏⵣⵉⴼⵏ ⴷ ⵉⵥⴻⵖⵔⴰⵏ ⵉⵏⵓ .ⵉⴳⵍⵍⵉⵏ ⵉⴽⴽⴰ ⴰⵔ ⵉⵙⵙⴰⵍⵍⴰ ⴱⵓⵜⴻⴳⵣⵓⵜ ⵏⵏⴻⵙ,ⴰⵔ ⵉⵙⵔⵉⴷⴷⴰ ⵜⵉⵙⵏⵏⵉⵜ ⵏⵏⴻⵙ ⴳ ⵎⴰⵢⴷ ⵉⴳⴰⵏ ⵉⴷⵉⵔ.ⵢⵓⴳⵊ ⵉⴳⵍⵍⵉⵏ ⵢⵓⴷⵊⴰ ⵜⵓⵇⵍⴰⵜⵉⵏ ⵏⵏⴻⵙ ⴳ ⵎⴰⵢⴷ ⵉⴳⴰⵏ ⵜⴰⵎⵏⴰⵟ ⴳ ⵜⵎⴰⵣⵉⵔⵜ ⵏⵏⴻⵖ.ⵉⴼⴽⴰ ⴰⴳⴻⵔⴹ ⵏⵏⴻⵙ ⵉ ⵓⵃⵎⴰⵍ ⵏ ⵉⵢⵢⵓ ⵏⵏⴻⵙ, ⵓⴱⴹⴰⴹ ⴷ ⵓⵙⵏⴻⴽⵎⵔ ⵏⵏⴻⵙ,ⵉ ⵓⵙⴰⵖⵉⵏ ⴷ ⵓⵏⴷⴰⵀ ⵏⵏⴻⵙ,ⵉ ⵓⵙⴻⴽⵜⵓⵍ ⴷ ⵓⴳⵏⵓ ⵏⵏⴻⵙ,ⵉ ⵓⵙⴰⵔⵉⴹ ⴰⴼⴻⴳⵏⴰⵏ ⴰⵖⴻⴷⵎⴰⵏ ⴰⵎ ⵡⵉ-ⵏ ⵉⴼⴻⵍⵙⵟⴰⵏ ⴷ ⵉⵍⴻⴱⵏⴰⵏ ,ⵜⵣⴻⵎⵏⵉ,ⵉⵍⵙ ⴰⵎⴰⵣⵉⵖ ⴷ ⵓⴼⴻⵍⵣⴼ ⵏ ⵉⵍⵉ.ⵉⴳⴰ ⴰⵏⴰⵥⵓⵔ ⵉⵜⵜⴰⵢⵍⴰⵍⵏ ⵖ ⵉⴳⵏⵏⴰ ⵏ ⵓⵙⴻⵏⴼⵍⵓⵍ ⵙ ⵉⴼⵔ ⵏⵏⴻⵙ.ⵉⴳⴰ ⴰⵔⴰⴽⵯ ⵉⵜⵜⴰⵢⵍⴰⵍⵏ ⴳⴻⵔ ⵉⵛⴱⴰ ⵏ ⵉⵡⴷⴰⵏ ⵎⴰⵔ ⴰⴷ ⵉⵙⵙⵉⵡⴹ ⴰⵣⴰⵏ ⵏⵏⴻⵙ ⵉ ⴽⵓ ⴰⴼⴳⴰⵏ ⴰⵡⴷ ⵡⴰ-ⵍⵍⵉ ⵎⵉ ⵜⵓⴹⵏ ⵜⵙⴻⵏⴷⵓⴱⴻⵏⵜ ⵏⵏⴻⵙ.ⵜⵍⴰⵡⵜ ⵏⵏⴻⵙ ⵜⴳⴰ ⴰⵙⴰⴼⴰⵔ .ⵜⴰⵣⴻⵎⵏⵉ ⵏⵏⴻⵙ ⵜⴳⴰ ⵜⴰⵎⴰⵜⴰⵔⵜ ⴳ ⵓⴱⵔⵉⴷ ⵏ ⵓⵎⵉⵛⴽⵉ.ⵜⵓⵔⴰⵔⵉⵏ ⵏⵏⴻⵙ ⴳⴰⵏⵜ ⵜⵉⵙⴻⴼⵔⴰⵜⵉⵏ ⵉ ⵡⴰ-ⵏⵏⴰ ⵓⵔ ⵉⵣⵎⵉⵔⵏ ⴰⴷ ⵉⵙⵙⴻⴼⵔⵓ ⴰⴱⴹⴰⴹ ⵏⵏⴻⵙ.ⵓⵔ ⵙⴰⵔ ⵜⵜⵓⵖ ⵜⴰⵡⴰⵍⵜ ⴷⴷⴻⵖ « ⵛⴻⵢⵢⵉⵏ ⵜⵔⵉⴷ ⵜⵉⵜⵔⵉⵜ ⴰ ⵢⵓⵍ ⵉⵏⵓ ⵏⴻⴽ ⴰⵛⴰⵍ ⴰⵢⴷ ⴳⵉⵖ »ⴰⵛⴽⵓ ⵜⴳⴰ ⵜⴰⵡⴰⵍⵜ ⵜⴰⵖⵓⴱⴰⴱⵜ ⵉⵙⵙⴰⵎⴰⴽⵏ ⴰⵙⴰⵜⴰⵎ ⵉⵍⵍⴰⵏ ⴳⴻⵔ ⵓⵏⴻⴱⴹⴰⴹ ⴷ ⵜⵃⴰⵎⵉⵍⵜ ⵏⵏⴻⵙ ⵉⵣⴻⴷⵖⵏ ⵜⵉⴱⵔⵟ ⵏ ⵓⵀⵓⵙⴽⵢ,ⵉⵙⵙⴻⴼⵔⵓⵏ ⴰⵙⴻⵅⵔⴽ ⴷ ⵓⴱⴻⵢⵜⵍ ⵍⵍⵉ ⴰⵔ ⵉⵜⵜⴻⵙⵢⴰⴼⴰ ⵓⵏⴻⴱⴹⴰⴹ ⴰⴷⴷⴰⵢ ⵓⵔ ⵢⵓⴼⵉ ⵉⴹⴰⵔⵏ ⴷ ⵉⴼⴰⵙⵙⴻⵏ ⵎⴰ ⵙ ⵉⵜⵜⴻⴳⴰⴼⴰⵢ ⵙ ⵜⵉⴱⵔⵟ ⵏⵏⴰ ⴳⵉⵙ ⵜⴻⵣⴷⵖ ⵜⴰⵏⴻⴱⴹⵉⵟ ⵏⵏⴻⵙ.ⵜⴰⵡⴰⵍⵜ ⵉⵙⵙⴻⴼⵔⵓⵏ ⴰⵎⵍⴰⵙⴰⵢ ⴳⴻⵔ ⵜⴰⵡⴻⵏⴳⵉⵎⵜ ⴷ ⵓⵙⴻⵎⵍⴻⵍ,ⴳⴻⵔ ⵜⴰⵣⴻⵎⵏⵉ ⴷ ⵜⵡⴰⵔⴳⵉⵜ,ⴳⴻⵔ ⵓⴼⵔⴰⴽ ⴷ ⵓⵔⴻⴼⵔⴽ.ⵓⵍ ⵏⵏⴻⵙ ⵉⴽⴽⴰⵔ ⵙ ⵜⴰⵢⵔⵉ,ⴰⵔ ⵉⵜⵜⴻⵃⴹⵓ ⵉⴳⵏⵏⴰ ⵎⴻⵇⵇⴰⵔ ⴰⵔ ⵜ ⵉ ⵜⵜⴰⴽⵙⵏ ⵉⵣⵓⵢⴰ ⵏⵏⴻⵙ ⵎⴰⵛⴰ ⴰⵊⴰⵏⵉⴳ ⵏⵏⴻⵙ ⴷ ⵓⵇⴰⵣⵉⵢ ⵏⵏⴻⵙ ⴳⴰⵏ ⴰⵛⴰⵍ ⵏⵏⴰ ⴷⴰ ⵜⵜⴰⵛⵍⵏ ⵎⴻⴷⴷⴻⵏ ,ⵏⵏⴰ ⴰⵔ ⵜ ⵙⵙⴻⵍⴽⵓⵏ.ⵓⵍ ⵏⵏⴻⵙ ⵓⵔ ⵉⴼⵍⵍⵉⵙ ⴳ ⵉⵜⵏⴰⵏ ⵉⴷ ⵜⴰⵡⴻⵏⴳⵉⵎⵜ ⵏⵏⴻⵙ ⴰⵔ ⴰⵙ ⵜⴻⵙⵙⴻⵛⵜⴻⵢ ⵉⵏⴰⵊⵉⴳⵏ,ⴰⵡⴰⵏⵉⵍ ⵏⵏⴻⵙ ⴷⴰⵜ ⵜⴰ-ⵏⵏⴰ ⵉⵣⴻⴷⵖⵏ ⴰåⴰⵜⵉⴼ ⵏ ⵡⵓⵔⵖ.ⵓⵔ ⴷⵎⵉⵖ ⴰⴷ ⵉⴳⴻⵣ ⴰⵛⴰⵍ ,ⵏⵏⵓⵔⵣⵖ ⴰⴷ ⵉⵖⵣⵉⴼ ⵓⴳⴻⵔⴹ ⵏⵏⴻⵙ ⵓⴳⴳⴰⵔ ⵏ ⵜⴰⵖⵣⵉ ,ⴰⴷ ⵉⴼⵍⴻⵃ ⵓⴳⴳⴰⵔ ⵏ ⵓⴼⵍⴰⵃ .ⵣⵉ ⴽⵓⴷ ⵉⵏⴹⴻⵡ ⵜⵉⴼⵔⴻⴽⵜ ⵏ ⵓⵍⴰⵖⵉⵣ ⵜ ⵉⵙⵙⴻⴽⵛⴻⵎⵏ ⵙ ⵉⵊⵢⵉ ⵙⵙⵉⵍⵉⵖ ⵜⴰⵖⵓⵏⴼⵉⵜⵜ,ⵙⵏⵉⵎⵎⴻⵔⵖ ⵔⴻⴱⴱⵉ ⵉⴷⴷⴻⵖ ⵉⵏⵊⴻⵎ ⵎⴰⵛⴰ ⵜⵜⵓⵥⵡⴰⵢⵖ ⵙ ⵓⵏⴻⵖⵎⵉⵙ ⵏⵏⴻⵙ.ⵔⴻⵄⴱⵖ ,ⵓⵔ ⴼⵍⵉⵙⵖ ⴳ ⵓⵏⴻⵖⵎⵉⵙ ⴰⵍⵍⴻⵢ ⵉⵜⵜⵓⵙⴻⵏⵜⵎ..ⵛⴻⵖⴱⵖ ⵛⵉⴳⴰⵏ ⴰⵀⴰ ⵎⵢⴰⵏⵏⴰⵖ ⴷ ⵜⵡⴻⵏⴳⵉⵎⵜ ⵉⵏⵓ « ⵓⵔ ⵉⴼⴼⵉⵖ ⵉⵊⵢⵉ ⴰⵍⵍⴻⵢ ⵉⵊⵊⴻⵢ ⵉ ⵎⴰⵅ ⴰⴷ ⵉⴳⴻⵣ ⴰⵛⴰⵍ ?!!ⵎⴰ ⴰⵜⵜⴰ ⵜⵓⵏⴰⵏⵜ ⵏⵏⴰ ⵜ ⵢⴰⵖⵏ ⴰⵍⵍⴻⵢ ⵉⴳⴳⴰⴷⵊ ?!! »ⴰⵏⴻⵖⵎⵉⵙ ⵏⵏⴻⵙ ⵉⴳⴰ ⵢⵉ ⴰⵏⴰⴳⵉⵙ .ⴷⴰⵜ ⵓⵢ-ⴰ ⵓⵔ ⵓⴼⵉⵖ ⵅⴰⵙ ⴰⴷ ⴰⴷ ⴼⴻⵛⴷⵖ ⵉⵖⴼ ⵉⵏⵓ ⵙ ⵢⴰⵜ ⵜⴰⵡⴰⵍⵜ ⵍⵍⵉ ⵜⴽⴽⴰ ⵜⵎⴻⵛⵏⴰⵢⵜ ⵜⴰⴼⵔⴰⵏⵙⵉⵙⵜ « ⵎⵉⵔⴰⵢ ⵎⴰⵜⵉⵢⵓ » ⴰⵔ ⵜ ⵉ ⵜⵜⵉⵔⵉⵔ « ⵓⵔ ⵏⴻⵏⵏⵉ ⴰⴷ ⵏⴻⴷⴷⴻⵔ ⴰⵙⵍ ⵏ ⵡⴰⴷⴰ ⵏⴻⵎⵙⴰⴼⴰⴹ ».ⵓⵔ ⵏⵜⵜⵓⵢⴰⵇⵇⵉⵍ ⴰⴷ ⵏⴳⴳⴰⴷⵊ ,ⵓⵔ ⵏⵜⵜⵓⵢⴰⵇⵇⵉⵍ ⴰⴷ ⵏⴻⵙⵢⴰⴼⴰ ⴰⵜⴻⵖⵛⴻⵛ ⴳ ⵢⴰⵏ ⵡⴰⵙⵙ.ⵉⴹⵓⵍⵍⴻⵢ ⴰⴷ ⴳⵉⵏⵜ ⵡⴰⵍⵍⴻⵏ ⵏⵏⴻⵖ ⵉⵖⴱⵓⵍⴰ ⵏ ⵡⴰⵎⴰⵏ ⵉⵔⵣⴰⴳⵏ ⵎⴰ ⵙ ⵏⵙⵙⵉⵔⵉⴷ ⵓⵍⴰⵡⵏ ⵏⵏⴻⵖ ⵣⴻⴳ ⵓⵏⴻⵣⴳⵓⵎ .ⴰⵏⴰⵥⵓⵔ ⵏⵏⴻⵖ ⴰⵅⴰⵜⴰⵔ ⵉⴳⴻⵣ ⴰⵛⴰⵍ ⵎⴰⵛⴰ ⵉⵙⵓⵍ ⵉⴷⴷⴻⵔ ⴳ ⵓⵍⴰⵡⵏ ⴷ ⵓⵍⴰⵇⵉⵏ ⵏ ⵎⴻⴷⴷⴻⵏ ,ⵉⵙⵓⵍ ⵉⴷⴷⴻⵔ ⵉⴷⴷⴻⵖ ⵉⴼⴻⵍ ⴰⵎⴽⴽⴰⵙⵓ ⵏ ⵜⵥⵓⵔⵉ,ⵉⵡⵉ ⵙ ⵍⵍⵉ ⵉⵙⵙⴻⵏⵄⴷ ⵉⵙ ⵉⴽⴽⴰ ⴰⵙⴰⵍⴰ ⵏ ⵉⴱⴱⴰ ⵏⵏⴻⵙ ⴰⴷ ⵜ ⵉⵙⵙⴻⴳⵍⴻⵏ ⵔⴻⴱⴱⵉ.
ⴰⵙⴻⴼⵔⵓ ⵏ ⵉⵡⴰⵍⵉⵡⵏ :
- ⵜⵎⵉⵊⴰ :La voix.
- ⴰⴷⴻⵢⵣⴰⵏ :Poétique.
- ⴰⵣⴻⵎⵏⴰⵏ :Sage.
- ⵜⵍⴰⵡⵜ:La mélodie.
- ⴰⴼⵓⵖⴰⵍ :Triste.
- ⴰⵎⴻⴷⵣⴰⵏ :Joyeux.
- ⴱⵓⵜⴻⴳⵣⵓⵜ :Outil de musique .
- ⵜⵉⵙⵏⵏⵉⵜ :La corde dans un tambourin.
- ⵉⵣⴻⵏⵣⵉⴼⵏ :Les nerfs.
- ⴰⵔ ⵉⵙⵔⵉⴷⴷⴰ :Faire danser.
- ⵉⴷⵉⵔ:L’horizon.
- ⵜⵓⵇⵍⴰⵜⵉⵏ:Les échos.
- ⴰⴱⴹⴰⴹ :L’amour.
- ⴰⵙⵏⴻⴽⵎⵔ :Le fait de subir.
- ⴰⵏⴷⴰⵀ:Le fait de guider.
- ⴰⵙⴻⴽⵜⵓⵍ:L’environnement.
- ⴰⴳⵏⵓ:Le problème.
- ⴰⵙⴰⵜⴰⵎ :La distance.
- ⵜⵉⴱⵔⵟ :Le sommet.
- ⴰⵀⵓⵙⴽⴻⵢ :La beauté.
- ⴰⵙⴻⵅⵔⴽ :La privation.
- ⴰⴱⴻⵢⵜⵍ :La déception.La frustration.
- ⴰⵎⵍⴰⵙⴰⵢ :La lutte.
- ⴰⵙⴻⵎⵍⴻⵍ:La sympathie.
- ⴰⴼⵔⴰⴽ :La conscience.
- ⴰⵔⴻⴼⵔⴽ :L’inconscience.
- ⵢⵓⴽⵙ :Maudir.
- ⵉⵣⵓⵢⴰ :Ceux qui ont le même âge.
- ⴰⵇⴰⵣⵉⵢ :Le squelette.
- ⴰⵊⴰⵏⵉⴳ :Le corps.
- ⵓⵔ ⵉⴼⵍⵍⵉⵙ:Défier.
- ⵉⵜⵏⴰⵏ :Les obstacles.
- ⵉⵏⴰⵊⵉⴳⵏ:Les obstacles.
- ⴰⵔ ⵉⵙⵙⴻⵍⴽⵓ :Mépriser.
- ⴰⵡⴰⵏⵉⵍ :La valeur.
- aåatif :Le nid.
- ⵓⵔⵖ:L’or.
- ⴰⴷ ⵉⴼⵍⴻⵃ :Etre large.
- ⴰⵍⴰⵖⵉⵣ :La crise de santé.
- ⵉⵊⵢⵉ :L’ hôpital.
- ⴰⴷ ⵉⵙⵙⵉⵍⴻⵢ ⵜⴰⵖⵓⵏⴼⵉⵜⵜ:Se soulager.
- ⴰⴷ ⵉⵏⵊⴻⵎ:Etre sauvé.
- ⵉⵜⵜⵓⵥⵡⴰⵢ:Etre surpris.
- ⵉⴼⵍⴻⵙ:Croire.
- ⵉⵜⵜⵓⵙⴻⵏⵜⵎ:Etre affirmé.
- ⴰⴷ ⵉⵛⵖⴻⴱ :S’étonner.
- ⵜⵓⵏⴰⵏⵜ :Le mauvais sort.
- ⴰⴷ ⵉⴳⴳⴰⴷⵊ :ⵢⵓⴳⵊ :Partir.
- ⴰⵏⴰⴳⵉⵙ :Le choc.
- ⴰⴷ ⵉⴼⵛⴻⴷ:Présenter ses condoléances.
- ⵜⴰⵎⴻⵛⵏⴰⵢⵜ :La chanteuse.
- ⴰⵜⴻⵖⵛⴻⵛ:La tristesse.
- ⴰⵍⴰⵇⵉⵏ:La mémoire.
ⴰⵖⴰⵣⴰⴼ ⵎⵓⵃⵎⵎⴰⴷ ⴰⵙⵙ ⵏ 07/01/2062 ⵉⵎⵙⴰⵙⴰⵏ ⴷ 19/01/2012.
Vos réactions (0)