Amdyaz n twtmt ayad alhyan d ujnDiD n Twargiwin
Amdyaz amqran « ayad alhyan » lli ittusan s umdyaz amaziv n tmvart issfuvd ussan ad yat tadla / tawckint (tadlist) n tmdyazin ddu n uzwl " ajnDiD n twargiwin" nvd isuqqas n twargiwin , tadla yad lli igan adlis wiss sDis dar umarra nv amqran v igr n tirra d usnflul , tg tadla n tmdyazin tiss kradt s tmaziv , tffavd g imprimerie lououroud tivrmt n Inzgane.
Avmus n tdala n "ajnDiD n twargiwin" iga umlil tdl imik n tzuvi fssusn ityar v waggul nns izwarn uzwl nns s uskkil n tfinav s ukl azggwav izurn mklli ityara wassav n umdyaz n uskkil alatini s uvl abrkan sdidn ddu nns yat twllaft n ull ,aggur igran gis iwllafn n idlisn n umdyaz d kra n igzzumn n tizwira nnsn.
Tyara tadla yad n tmdyazin s sin iskkiln alatini d tifinav , gis 90 n tasna tadla yad tga yan wanaw amaynu g tmdyazt tatrat , tga yan umsawal vzzifn gr umdyaz d ixf ns f isyafatn nns, ibbi gis isskrf isawl f tayri nns.
Amsawal n umdyaz ayad alhyan d ixf nns iska f mnnaw isqsitn ttalsnin tukt n twala zund :
- inyyi max ? --14 n tmdyazin
- isd i sur tssint a lalla ? --14 n tmdyazin
- tagldunt ... 8 tmdyazin
- taziri... 1 tmdyazt
- macc ! / yuf yyi ... 2 tmdyazin
Mass ayyad alhyan amdyaz d umarra aqran iga yan v imdyazn imazivn lli tussanin s tvarast nnsn tatrat v igr n tmdyazt, iga aslmad n tutlayt tmazivt g tsdawit n agadir ar ittara ku anawn n tsakla issfuvd yat tmzgunt lli s yiwi tasmvurt n tzlva n tirra ddu n uzwl « tamzgunt n afgargan » viklli yura ungal ddu uzwil « yan usggwas g tzgi » yara tidlisin n tmdyazt « wiss sa ignwan » d « tga tguri tslit ig iD imicil » d « ajnDiD n twargiwin » .
Ad ur nttu izd amdyaz nv amqra ayad alhyan iga amdyaz d umarra s tutlayin timaDlanin issfuvd yat tdlist n tmdyazin s tutlayt n tfransist ils n molir ddu n uzwl « fragments émergents » g fransa , ar ittara timdyazin s tutlayt tasblyunt , ilin dars tugt n isiggln f tutlayt tamazivt .
Amdyaz n twtmt isawl f taziri d ID d tayri yini :
taziri
tgit illis n ignwan
ur tn tdrut d yan
iv tn tzgrt s tsurifin
tawada n tmnukalt
mqqar am ssutln itran
mani am akk lkmn
ivd tvlit v tillas n yiD
isakk mmrn ulawn
mla yufa yan
yan igan nkkin
ad gin ayyur
isawl umdyaz f isyafatn ns s tidt yini:
yuf yyi
ivd ssutlv i wl inu
agadir n ccinwa
ssdusv asn iggura
srsv azazuy n twargiwin
krzv gis v yat tsga
turtitin n babilyun
ad gis tyagaln iskla
urtn izri yan
ssutcv gis v yat tsga
ir3man n ufr3un
ann gisn mdlv
asyafa nm a kilobatra
ad ddrn iman v usyafa
srsn ilmma anzgum
Mohamed Arejdal