Ass ad iga ass amnzu g yan usggas yadn. Idgam, ismd (
finir)gis yan usggas yadn, walli ismdn, d walli hra d iluln, gan isggasn imadlann (
universels) acku gan g idls (
culture) n ighrfan lli nbdnin s tussna nsn amadal akkw. Ur ufin ighrfan lli mdanin (
sont faibles) ghas ad tn dfurn. Asggas amazigh ur nn yaggug s umya g usggas amadlan. Acku ass n krad d mraw g wayyur n innayr, rad ismd yan usggas amazigh ilal d yan yadn lli igan amaynu.
Mac is nn azn imazighn s tghrma n wass ad mk lli nn yaz usggas nsn s usggas amadlan? Hann awa imazighn icca tn waghzn mnck aya d, ur sul ghaman ghas g umiyn d ixfawn n inafaln am kiy d mad k irwasn! iyn iy yan umddakkl izmummg (
il sourit).
S tidt, wann iswingmn g usurs lli g llan imazighn ass ad, rad iggd; urd llig llan g ifassn n willi tn ur irin, ar asn qqazn ku ass igdyan lli g ur ad d ghlin igh nn gisn drn, mac lligh ar tssiwid tmagit nsn imazighn, ar gis ttrwaln, ar akkw ttmaghn ad tt nghin g kra n tkkal. Max? Acku tugtt nsn ur ssutgn (
ne pas valoriser) tamagit nsn, acku ur tt ssnn.
Yan gisn inna yasn: Tutlayt tamazight qah ns ur gis kra ur igin 300 n wawal. Tadsa!
Yan yadn inna yasn: Igh tram ad tbughlu taзrabt, nghat tantaliwin n tmazight!
Ur zrin ghas yan mnnaw isggasn llig tzmr yat trabbut n iзrabn n iming (
orient) ad skrn yan unmuqqar g tmdint n Merrakc xf mit? Xf ad d ktin yan umghar nsn, ikka tt inn g tmurt lli xf bdda allan iзrabn, allig as qqarn: Amaglal ijlan (
le paradis perdu) lli igan ass ad Sppanya, amghar ann nsn, yumz t ugllid amazigh: Iwis n Tacfin Yusf, ig t g ughzzu g tmdint n Aghmat allig immut. Anmuqqar n Merrakc ktin d gis iзrabn n iming iwis n Tacfin s uzawar, d trggamin, ktin d winsn s tulghatin. Aylli ittbbi tasa iga t llig ur illi yan hlli ikkan umnid n ugllid amazigh, ad fllas istan g unmuqqar ann kra ur igin yan umdyaz asudani qqarn as Muhmmad Elfayturi.
D tiyad, d tiyad…
Krad imdyatn ad hlli udan agh ad nssn tamagit tamazight is urta tli addur ns g tmura n imazighn. Isur yuf, ku tigira n usggas d umnzu ns, ad d nktay mqqar d aggasn ngh?
Ad awn, d ad awnt yarghud usggas amaynu, ad gingh yaf mad d yusan mayd izrin.
Mohamed Akunad