Max manwa izdarn ad inna uhu g tmurt ngh lli igan tamurt n tdimukracit ? middn qah nsn(akkw, tous) lan azrf ad skarn ikabarn n tsrtit, aynna rad ig uzur nsn ig t, aynna rad ig uklu nsn ig t, gn iy t iwtman ngh gan tiwtmin,wann dar turda g aya nn, izr tanbadt n usggas n 2007 llig gant sat tmghrin
Tinghlafin(ministre) zund nttnti zund irgazn, mqqar ar ttmcmucn yan mnnaw id wacc d istt tacc ar ttinin is tga tanbadt ikkattan, ad nn iqqar g imawn nsn.inyat : Amin, nnan ak ur nn idul yan ula yat g tfranin n wass n 7-9-07 llig d tlul tnbadt ad ngh, mac tadimukrasit ngh ur tt issihl aylli ttmcmucn id wacc d istt tacc, wid d tid lli bdda iskrkuzn ar ttllin s mayd isggann g tudrt ngh tsrtant ad t id ssaggn, ar bdda ssisginn tudrt ngh mqqar tmllul zund tiqqit n ukfay ilzan(fraiche),tamurt ngh tbidd xf tdimukrasit, yir iyt wann iran yagi wann yugin, tugga kkant agh d timizar lli igan azur n tdimukrasit, ad tnt igan d tmizar n i²rabn, willi agh d yadlli yiwin tifawt zg zik llig sul nlla g tillas, nimzilil,ilmma nisfiw akkw nddu allig tn nzwar g ubaraz n tdimukrasit, nili g tuktt ns, ilin d nttni g izddar, nttni ad agh ittinin mk ad, urd nkkni ad t ittinin, middn ad ittinin tjja tghnsit(lhbaqq)ur d nnttat ad t ittinin.
S mk ann nit urd iqqan ad nffr is llan kra n id yan lli ranin ad agh tryazn aman, nttni utin id wacc lli hra nbdr, wid ran ad rzin tadimukrasit ngh, ad tt skkattin, ikut s mit ?
S tmzzazart !(racisme)ad kn yari rbbi yari agh g tmzzazrt ad lli ran wid ad agh tt id awin s tmurt ad lli tt jju ur issnn, ran tasrtit kkn d sis tamzzazart.
Tamurt ngh ar ttini : tasrtit iyih, tamzzazart uhu !s mk ann nit yacki d wad lli mi ttinin Adghrni lli igaan amastan(avocat) isfawn g uzrf, yiri ad d isgar g tmurt ngh aylli jju gis ur illin, akabar amazigh !
Zzigh tighri yad lli nssaqqra i tarwa ngh g tsdawiyin illa gisn mad tsbiybigh(rendre entete)Adghirni ad ur ar ttkkant udm ns!max sghawsan imazighn s kra n ukabar? mad jju ikksn i imazighn ak kcmn s ikabarn ad nit lli illan ? winsn ad gan, d nkkni akk ma yadlli nga ghas imazighn ?
Tamzzazart isqqaqn ad id iga ad tinit akabar amazigh g tmurt ngh.
Ad ak nn ur iluh iblis amakus g ixf nk a Adghirni is d igh ar nttini Lmaghrib a²rab, d igh ar nttini tamurt ngh tga ta²rabt,d igh ar ns²rrab g tmurt ngh ku taghawsa mqqar d isan d idan, is d nkkni ad igan imzzazarn ! uhu ad ur tghalt mk ann nkkni nga idimukratn, ur ar nttini ghas aylli ran middn, mqqar tn ur nsaqqsa mad ran !acku nssn is ur ad irin amr aylli asn nenna iffgh asn, d ad ak dagh ur inna iblis nk is d aya nn ur igi tadimukrasit n tidt, ssn a Adghirni is d ur iqqan ad tg tdimukrasit ngh zund tin irumiyn, max nnufl ad ndfur willi ur umznin abrid ifawn g tdimukrasit ? ssn dagh is d darngh ad nn sisn tkka tdimukrasit, darngh agh tt inn ssufdn,(emprunter)mac ur as ssnn sskwnan tt, rrjnn tt(falsifier) llig tt ira rbbi s wafulki tghama darngh nkkni tzdg sul tughd mk lli yadlli tga g umzwaru.xf ad tnzut a Adghirni mqqar tbiybght, allig ur ar tssflidt amr i ixf nk zr is tzdar tdimukrasit n irumiyn ad tsurf i yan urgaz lli ittln i igiman(des milliers) n i²rrimn d t²rrimin lli ganin id war tawuri allig asn yiwi imik lli smunn, iffgh d is ar hlli gisn ittnaz s mk ann nit ur illi mad ismrrtn agaz ann, ur illi mad t inn iqqnn g kra n ughzzu(prison)nnig mk ann akkw,ur illi mad t isaqqsan xf ubkkad ann, is as tfka tdimukrasit ngh ad ig amzwar n inghlafn n tmurt, tadimukrasit ngh ur tgi tahkkuct(naive) zund tin irumiyn lli s ar ttwargan kra n id yan d istt yat lli mi tmlilliyn ixfawn nsn zg mad tn d utn izwutn n willi d ur nmun g ubrid nsn ifrghn, nnigh ak tingh ur ar tsgiddi aylli yadlli ur igaddan, tadimukrasit ngh da tsmmzlay, acku tsfaw, mqqar nttini middn gan yan, nttni s tidt ur gin yan, mamk s yufa uzrf lli tn inbdn ad ig yan ?! max abkkad n urgaz iwis n tuwja mqqurn iga zund win iwis n udrar lli d ninkrn d tkufant?! igh ndfar anufl nnun, nmani rant tawjiwin ngh lli kkusanin tanbadt zg zik ? id is trit ad urrint s izddar ?! ilmma ad tqqrbl ddunit, uhu ur ad niri ad tsrgt i ddunit ad tqqrbl, trit s ukabar nk ad agh d tawkt tamzzazart, hayyagh nsrd ak s tgmmi n uzrf lli ur illin g ufus ngh ula winnun, nttat ad issnn is ibidd ukabar nk xf tmzzazart ngh d uhu t tga tin ixf ns rad tnna aylli d yuckan d uzrf , azrf lli d iswan g tdimukrasit , ad ur ttut a Adghirni, talli tt igan taghd !
Mohamed Akunad